Vigogo Wawarudisha Watoto Bongo

                              Rais Dk John Pombe Magufuli.
BAADHI ya vigogo ambao ni watumishi wa muda mrefu serikalini, wameamua kuwarudisha nyumbani watoto wao waliokuwa wakisoma nje, ili waendelee na masomo kutokana na staili ya kubana matumizi inayofanywa na serikali ya awamu ya tano.

Kwa mujibu wa chanzo kilicho serikalini, mianya mingi iliyokuwa ikitumiwa na vigogo hao kupata fedha, kama vile semina, vikao, kongamano na safari kufutwa na hivyo kuwafanya waishi kwa vipato vyao halali.

“Zamani kulikuwa na vyanzo vingi vya hela zaidi ya mshahara, mtu angeweza kupiga simu moja au mbili, tayari ameingiza fedha, lakini hivi sasa kila sehemu imebana, watu wanawarudisha vijana wao nyumbani kwa sababu siyo rahisi kumudu gharama za masomo kwa mishahara,” kilisema chanzo hicho.

Chanzo hicho kilidai kuwa maofisa wa serikali hivi sasa wamekuwa waoga hata kuchukua pesa halali kwa hofu ya kutumbuliwa, kwani hakuna dalili kama spidi ya kubana matumizi inayochukuliwa na Rais Dk John Pombe Magufuli itapungua.

Ofisa mmoja wa Wizara ya Elimu, Sayansi, Teknolojia na Ufundi ambaye alikataa kutumiwa kwa jina lake kwa vile siyo msemaji, alisema watoto wanaosoma nje hurejea nyumbani mara kwa mara, hivyo ni vigumu kujua kama ni sababu ya ukata wa wazazi wao au kuna sababu zingine.

“Sehemu nzuri ambako unaweza kupata data ni kutembea katika mashule, hasa binafsi ambako watoto wengi wa watumishi mabosi wa serikali wanasoma, lakini hili la kurejea nchini ni la kweli,” alisema ofisa huyo.

Tangu kuingia madarakani kwa serikali ya awamu ya tano, kumekuwa na shinikizo la kubana matumizi ya fedha za serikali, ikiwemo kukataza vikao vya kulipana posho visivyo na tija, safari holela za ndani na nje pamoja na kuondolewa kwa sherehe zisizo na tija.